|
El nomáu procesu Bolonia ye un intentu de la Xunión
Europea por crear un sistema d´educación superior
homoxéniu nos estaos pertenecientes a la Xunión. Ye
un procesu que xorrez d´un intentu de facer una
“revolución educativa” por órganos supranacionales y
dalgunos d´ellos escoyíos anti-democráticamente;
como´l Bancu Mundial, la Direutiva Bolkenstein y les
partes más capitalistes y neolliberales de la Xunión
Europea pa crear un proyeutu educativu llamáu
“Espaciu Européu d´Educación Superior”(E.E.E.S.)
ensin entrugar a la comunidá académica y basándose
nos enfotos económicos particulares, que mos
llevarán a la desapaición de los servicios públicos
nes Universidaes dixebrándose de les necesidaes
sociales en beneficiu de los intereses privaos. Pero
esto nun ye un intentu repentín de camudar la
educación pa consiguir una Europa del capital capaz
de ser una potencia económica competitiva; NON. Esto
yá vien d´atrás, con un intentu de mercantilizar la
universidá y convertila nun espaciu onde invertir ya
obtener rentabilidá, nun escaezamos la llei aprobada
pol PP y postreramente reformad pol PSOE, como ye la
LlOU. Asina como la reciente LlOE qu´intenta facer
lo mesmo cola enseñanza media.
La finalidá d´esti procesu ye “sofitar la movilidá y
la empleabilidá de los ciudadanos y el xorrecimientu
global del nuesu continente” o como diz notra zona
del testu “llegar a una formación competitiva de los
nuesos estudiantes pa un mercáu de trabayu que
supera les nueses fronteres”. El verdaderu interés
nun ye educar nin formar a futuros ciudadanos, con
capacidá de critica, non; el futuru ye formar
capacidaes o destreces… Loque necesita la so sociedá
del capital “tontos perútiles” y flesibles,
altraviés d'una formación descualificada que mos
permita integramos nun mercáu caóticu como ye´l
capitalismu.
Esto too inda ensín entrar a falar del tipu
d´ayalguería… Pues nun va ser pública, sinón privada
(sobre manera de los POSGRAOS, de los que falaremos
más tarde); onde les empreses van decidir que
s´investiga y cómo. Y si-yos sal rentable económica
y socialmente. Equí diremos desgranando pocu a
pocu'l tramáu del proyeutu Bolonia.
ESTRUCTURA DE LOS
ESTUDIOS:
Los nuevos estudios dixebráranse en dos ciclos, el
grau y el posgrau:
• GRAU: La duración de tolos títulos
ta inda ensin determinar (pero puede falase de 3 a 4
años), esto tien l´enfotu de formar carreres cortes
y xeneralistes que formen profesionales dimpuestos a
formar parte del mercáu llaboral, dexando a un llau
la formación científica ya humana; pretendiendo
camudar los centros universitarios en centros de
formación profesional.
L'horariu d'hores llectives va ser puesto por un
programa de creitos, que va ser equivalente a 1500
hores al añu (más d´una xornada llaboral normal);
imposibilitando a munchos alumnos realizar los sos
estudios si nun s´acompaña con un modelu de
financiación o de beques afayaizu, y ensín dar la
posibilidá de trabayar al mesmu tiempu d´estudiar yá
que ye un horariu escesivu.
• POSGRAU: Buscaríen una formación
dirixida a trabayos de mayor cualificación, dividíos
estos mesmos en dos títulos Master y Doctor. Lo
qu´esmolez ye´l modelu d´ayalguería d´esti tipu
d´estudios, guiándomos poles declaraciones del
Secretariu d´Estáu d´Universidaes quién diz, debío
al altu coste d´estos: “Los precios públicos de los
posgraos van ser un pocu más elevaos que´l preciu de
los graos, asina qu'habrá que cavilar en nueves
formes d´ayalguería; la universidá va poder
establecer alcuerdos de collaboración con otres
istituciones o organismos públicos y privaos, asina
como con empreses o industries”. Estes declaraciones
dexen bien claros los enfotos d'abri-yos les puertes
d´ayalguería (poro, el control) de los posgraos y de
les universidaes. Polo tanto, nun ye solo que se
corra´l riesgu de que la investigación científica
pueda tar guiada polos criterios empresariales, colo
cuál desapaecería imparcialidá, y les
investigaciones que nun seyan rentables
económicamente pero sí relevantes socialmente. Esto
va dar pasu a que l'accesu a los posgraos y por
tantu a los meyores puestinos de trabayu seya pa una
mínima parte d´estudiantes; pa una élite ecónomica.
METODOLOXÍA
DOCENTE:
Dalgunes clases pasaríen a ser d´asistencia
obligatoria, nes qu´encargarán trabayos o tarees
diaries, con una evaluación continua y nes
qu´usaráse muncho l´ordenador; esto depende de cómo
se güeye pues nun puede ser malo, pero evidencia
l´enfotu por xorrecimientu d´habilidaes y non de
conocimientos. Estes habilidaes nes que se puen
atopar la capacidá de deprender a deprender, de
resolver problemes, manexar la información y de
trabayar en grupu; dexando a un llau otres más
importantes como´l conocimientu de llingües o de les
nueses cultures o otres foriates (tema del que
falaremos llueu) determinaes por una serie de
cuestionarios unviaos a una muestra de graduaos
d'ente los 150 que s´incorporaron más rápido al
mercáu llaboral, un conxuntu d´empreses y 15
académicos de cada universidá.
Esto dexa nun mal llugar a esti proyeutu pues vese
bien claro que sustituyen la educación y formación
científica y como persona pola demanda de les
empreses.
El profesoráu dexa´l so papel como conocedor fondu
de la materia qu´imparte a un simple guía nel
procesu d´alquirir estes habilidaes, pasaría a ser
un simple compañeru d´estudios o animador pa facer
dinámiques de grupu. Estos planes d´estudios asina
como los profesores, tarán supervisaos poles
empreses pa dir actualizando estos planes d´estudiu
pa facer trabayadores a midida.
PLANES D´ESTUDIU:
Los planes d´estudiu, sobre manera como yá diximos
anteriormente nos graos, sedríen supervisaos poles
empreses, pa facer de los mozos una mano d´obra
útil, dócil y especializao n´aceutar el mercáu
llaboral y la demanda empresarial de les élites
d´esta sociedá capitalista; representada pol bancu
mundial y organos d'esti calter.
A too esto hai qu´amosar qu´esta homoxeneización de
les universidaes europees, va traer consigo
problemes pergrandes a la cultura asturiana; pues
nun respeta les diverses realidaes ya identidaes (yá
nun falamos dientro d´un determináu estáu, que yá ye
pergrave), que cada pueblu tien derechu a construir
llibre, ensín la torga de nengún estáu represor; y
democráticamente, con vistes a un avance coleutivu
de la sociedá asturiano.
Sobre manera ensín pone-y muries a les sos
necesidaes polítiques, culturales, como pueblu y
nación. L´asturianu, nesta situación nun diba quedar
marxináu como ta pasando anguaño nes estremaes
universidaes y na sociedá asturiana; sinón quedaría
apartáu completamente de cualesquier intentu
d´oficialidá o reconocimientu de la fuercia cultural
de la naciónasturiana.
Tamién puede falase del escluyimientu d´estos planes
d´estudiu llingües foriates tan perimportantes como
ye´l inglés; agora mesmo indispensable pa consiguir
cualesquier trabayu.
Con too y con ello, DARRÉU - mocedá nacionaliego
d´izquierdes – desiximos:
1. L´apertura d´un pernecesariu procesu
d´alderique, ampliu ya abiertu ente tola
comunidá universitaria y xuvenil, y tamién a la
sociedá asturiano sobre esti modelu educativu.
Naguamos pola supresión de toles muries y filtros
que torguen el llibre exerciciu d´esti alderique; yá
seyan económiques, alministratives, etc…
2. La retirada del Procesu Bolonia, la
disolución d´estos órganos non democráticos y la so
sustitución por otros horizontales onde participe
tola xente mozo.
3. Sofitar una Universidá pública,
democrática y popular:
• Pública: Debe ser un espaciu llibre
y abiertu a toos/es, ensin maxinación del tipu
económicu; debe ser financiada pol común pa´l común.
Ensçin nengún tipu de barreres.
• Democrática: Creyemos nuna
Universidá onde les decisiones seyan tomaes d´una
manera horizontal y clara. La sociedá asturiano debe
involucrase nel funcionamientu de la
Universidá y tien que retrucar a les sos necesidaes
y non a los enfotos de les empreses; solo a la
necesidá de los asturianos.
• Popular: Deber tar al serviciu de la
xente, non de les empreses y de la economía privao,
con una función critica, tresformadora, llaica y
coeducativa. Ye mester una educación que faiga'l
camín hacia una Asturies llibre, igualitaria, xusta
y respetuosa cola nuesa tierra.
4. Una Universidá Asturiana: La
Universidá debe ser la oportunidá pa crear
ciudadanos d´una Asturies meyor; por eso la
universidá dende l'empiezu tien de facer que nun se
marxine la cultura asturiana, abriendo nos sos
planes d´estudiu asignatures d´Asturies (por exemplu:
“Filoloxía Asturiana”) y toes elles n´asturianu; yá
que ye la nuesa llingua nacional. Too esto ye una
torga ensín un sistema educativu propiu, que seya un
potenciador de la nuesa realidá nacional, como
asturianos y como trabayadores.
5. La retirada de cualesquier llei que sofite
l´intentu de facer de la educación un espaciu priváu,
yá seya por parte de la Xunión Europea como por
parte del Estáu español. Como l´anterior LlOU y
agora la reciente LlOE.
Darréu pide a la mocedá asturiano que nun s´enfote
na sumisión, el vacíu y el silenciu; que nun ye la
primer vez que los poderosos s'atopen con una torga
nel camín por desfacer a la mocedá y a la clas
trabayadora asturiana, nun dexemos que mos faigan
trices la Universidá. Participa na llucha
escontra esti proyeutu.
NON A LA MERCANTILIZACIÓN DE LA UNIVERSIDÁ.
POR UNA UNIVERSIDÁ DEMOCRÁTICA Y ASTURIANA.
|
