La organización de mocedá desendolcó esta aición pa facer alcordanza de la entrada nel país a sangre y fueu del exércitu de la segunda república tres la Revolución de 1934 y la represión xabaz que vendría dempués.

Darréu, organización de mocedá independentista, fexo una aición na nueche del pasáu llunes 19 d’cchobre, que consistió en facer que les agues de les principales fontes de la ciudá d’Uviéu (Pza Cruz Roja, Pza San Miguel, Pza América, Pza Escandalera Y Pza Castilla) y Xixón (Begoña y fonte de los patos) amanecieran roxes como’l sangre daffechu. Les principales y más emblemátiques fontes de les dos ciudaes principales del país foron l’escenariu d’esta llamativa reivindicación. El recuerdu de la fin de la revolución asturiana y la refuga a los premios príncipe xuncense nesta aición vindicativa de la mocedá independentista revolucionario.

El finxu de facer "que sangren les fontes" ye’l facer alcordanza del fin de la revolución asturiana del 34 y la entrada a sangre y fueu del exércitu de la segunda república española nel país pa desaniciar la República d’Obreros y Campesinos d’Asturies, incumpliendo los alcuerdos de paz roblaos ente Lopez Ochoa y Belarmino Tomás, xenerales de los exércitos enfrentaos. Daquella, la represión xabaz española fizo correr ríos de sangre del Pueblu, sangre que tovia anguañu sigue escapándo.

Les polítiques neocolonianistes del Estáu Español pa con Asturies, faen qu’anguañu Asturies seya un ermu llaboral, a la cabeza nes tases de paru dientro l’estáu y la Comunidá Europea y con unes tases d’avieyamientu y emigración de la mocedá que recuerden a la de paises de los nomaos “tercermundistes”, frente a la alta productividá y dinamismu que caltuvimos demientres bona parte del sieglu XIX y XX, onde Asturies foi tierra d’acoyida d’emigrantes y onde les decenes de miles de trabayadores d’esta tierra amosaben una altísima formación cultural y política, que fizo posible que protagonizaren tantos y tantos fechos heróicos en defensa de los sos intereses de clase y tamién, como pueblu. Poro, la precariedá llaboral y la emigración forciada de la mocedá a la que nos conderga l’estáu facista español, faen que’l sangre d’esti Pueblu, especialmente de la mocedá te perdiéndose peles resquiebres d’esti sistema capitalista que mos oprime como Trabayadores y como asturianos y asturianes, lo mesmo qu’hai 75 años.

Esta mesma selmana amás, tien llugar n’Uviéu la escenificación d’esta política de pan y circu, cola entrega de los “Premios Príncipe de Asturias”, unos premios que tienen como únicu finxu la promoción y lexitimación del réxime borbónicu, onde además la elleición de los premiaos responde a dellos intereses que normalmente pocu tienen que ver col méritu personal de los galardonaos y munchu cola rentabilidá mediática y económica. Nun pue ser qu’una fundación de calter antipopular como esta disponga de de cientos de millones de l’ayalguería pública pa tirar como lo faen baxu’l falsu pretestu de facer publicidá internacional d’Asturies, puestu que la única publicidá que se fae fuera l’estáu ye pa los Borbones ya’l so réxime, herencia direuta del franquismu y tou un anacronismu en plenu sieglu ventiún. Cabe dicir que tamien s’apropiaren de forma antidemocrática del nome de la nuesa nación pa face-y publicidá al herederu al tronu d’esta casa real sin fundamentu hestóricu algún y siguiendo col mitu preferíu del españolismu más radical, el cuadonguismu.

Poro, dende DARRÉU queremos facer un llamau al Pueblu Trabayador Asturianu pa qu’asoleye de toles formes posibles el so rechazu a la familia real española, a los sos premios y a los abanderaos d’esta institución d’herencia facista y tamien encamentamos a tola mocedá qu’acuda a la manifestación qu’entama l’Ensame República Asturina n’Uviéu esti prósimu Xueves 22 d’Ochobre.

PUXA LA REPÚBLICA ASTURIANA, SOCIALISTA Y SOBERANA