Coincidiendo coles fiestes del Picadillu y el Sabadiegu de Noreña, Darréu entama esti prósimu sábadu 24 d’abril el I Gran Día del Gochu Asturñol .

Esti eventu tendrá como principal actividá la entrega’l Premiu del Gochu Asturñol del añu, que s’entrega por primera vegada. La entrega’l premiu sedrá como nun podría ser d’otra manera na yá mítica estatua del gochu de Noreña, na cai Florez Estrada. La "gala" d’entrega del galardón entamará de magar les 20:00 hores. Dende les 17 hores, desendólcase nos llocales del Llar d'Andecha el primer Picadillu Underground Fest qu'entama Darréu xunta Nora Anftifa.

Pa entregar esti premiu’l xuráu de Darréu lleva yá meses cavilando p’atopar un bon gochu que merezca esti galardón, y entá nun hai escoyíu un ganador d’ente los nominaos. Pa escoyer al ganador dende Darréu tamos teniendo en cuenta les dimensiones del animal, les capacidaes represives, antiasturianes y facistes del mesmu.

Amás, al ser el primer añu d’esti rellumante galardón dende Darréu vamos tener en cuenta la esperiencia y estensa trayeutoria de los nominaos. Con toa seguridá vamos tener presente al ganador del Premiu en Noreña p’aplaudilu como merez y da-y el galardón de parte de tol Pueblu d’Asturies. Asperamos que la xente de Noreña y d’Asturies s’avere a la entrega de premios, yá que va tar enllena sorpreses.

Dempués de la entrega de galardones dende Darréu queremos convidar a tol pueblu de Noreña a una espicha nel Llar d’Andecha de magar les 22:00 hores. La espicha sedrá a precios populares y nun faltará’l bon ambiente . Darréu de la espicha va haber tamién nel Llar d’Andecha una folixa colos meyores soníos combativos. Colo que la xornada queda percompleta: festival dende les 17hores, entrega premiu a les 20:00 hores, espicha a les 22:00 hores y folixa pela nueche.

¡Nun faltes al I Día del Gochu Asturñol en plenes fiestes de Noreña!