La organización de mocedá independentista Darréu quier llamar a la movilización esti prósimu vienres 7. Pedimos a la ciudadanía asturiana, n’especial a la mocedá qu’esprese’l so refugu a la política antiasturiana del Gobiernu del “ Principado” y acuda a la manifestación convocada pola Xunta pola Defensa de la Llingua Asturiana.

Dende Darréu desiximos la oficialidá de la llingua d’Asturies yá qu’entendemos que ye l’únicu camín pa que’l mayor padremuñu cultural que tien el país siga vivu y salga d’esta llaceriosa situación. Son munchos años yá de permanente ñegativa a normalizar la llingua asturiana y d’ataques a esta. Tanto PSOE como PP ñeguen sistemáticamente esti drechu cívicu del Pueblu Asturianu, y defienden posiciones totalmente etnocides. Por otru llau los cómplices de gobiernu del PSOE, colos sos delles marques, prometen defender la oficialidá pero paez escaecese-yos cuando aporten al so puestu, mercando asina’l so silenciu’l PSOE y escaeaciendo les sos promeses eleutorales.

Tamién queremos desixir al señor Vicente Álvarez Areces que pida perdón poles pallabres desafortunaes y falses de la selmana pasada, onde dixo que la oficialidá de la llingua yera cosa d’una minoría. Queremos recordar al señor presidente del “ principado” que sigún les encuestes feches pola xente del so partiu ye aplastante’l porcentaxe d’asturianes y asturianos d’alcuerdu cola total normalización del asturianu, ello ye, pola oficialidá. Caltenemos qu’estes declaraciones nun son más qu’un insultu a la ciudadanía asturiana y la so cultura. Declaraciones asina amuesen ñerviosismu ente l’executivu españolista que tenemos y nun tienen denguna credibilidá.

Los asturianos y asturianes qu’esiximos la oficialidá de la nuesa llingua inoramos les pallabres del señor Areces, yá qu’amás de qu’un drechu tan fundamental como esti nun ye cuestión de minories y mayories los asturianos tamos según toles encuestes publicaes a favor de la oficialidá. Les pallabres d’Areces, mentirosu crónicu, nun tienen dengún valor al llau de les de la UNESCO y otros organismos de calter internacional, que consideren la oficialidá como única forma de salvar la llingua.

Asina facemos un llamau a participar na manifestación qu’esti prósimu vienres 7 saldrá de la Estación del Norte d’Uviéu a les 19:30 hores y qu’entama la Xunta pola Defensa de la Llingua Asturiana. La mocedá nun pue quedar impasible ente l’etnocidiu y la situación llaceriosa que tien l’asturianu na estaya educativa.

¡ L’ASTURIANU LLINGUA OFICIAL YÁ!